बर्दिया,पौष ७
पत्रकारले गलत हर्कत गरे नेपाल पत्रकार महासंघको साथ नरहने नवनिर्वाचित अध्यक्ष निर्मल घिमिरेले बताएका छन् । स्वतन्त्र उम्मेदवारीबाट निर्वाचित भएका अध्यक्ष घिमिरेले शनिबार पदभार सम्हाल्दै यस्तो बताएका हुन् ।
पत्रकारले विश्वसनिय पुष्टि हुने समाचार लेख्दा कसैले धम्की दिने, प्रभावमा पार्न खोज्छ भने नेपाल पत्रकार महासंघ पत्रकारको पक्षमा सधैं लड्न तयार रहेको अध्यक्ष घिमिरेले प्रतिबद्धता जनाएका छन् । तर व्यक्तिगत लाभ र प्रतिशोधको भावनाले पत्रकारले गलत हर्कत गरे महासंघले साथ नदिने अध्यक्ष घिमिरेले स्पष्ट पारेका छन् ।
आजभोलि सामाजिक संजालले प्रेस स्वतन्त्रता खतरामा परेको अध्यक्ष घिमिरेले बताए । ‘पहिला पत्रकारले लेखेको समाचार पुष्टि गर्नुपथ्र्याे,’अध्यक्ष घिमिरेले भने,‘तर आजभोलि हात हातमा मोबाईल छ, जे मनमा लाग्यो लेख्छन् ।’ पत्रकारले त्यस्तो हर्कत नगर्न अध्यक्ष घिमिरेले आग्रहसमेत गरेका छन् । व्यवसायीक पत्रकारको हकहितको लागि महासंघ सधैं प्रतिबद्ध रहने नवनिर्वाचित कार्यसमितिले जनाएको छ ।
नेपाल पत्रकार महासंघ जिल्ला शाखा बर्दियाका नवनिर्वाचित कार्य समितिले शनिबार सपथ ग्रहण तथा पदभार सम्हालेका छन् । निवर्तमान अध्यक्ष यादव आचार्यले नवनिर्वाचित अध्यक्ष निर्मल घिमिरेलाई शनिबार पदभार हस्तान्तरण गरेका छन् ।